مخنوقه بــ دموعك أوي ...
و..مغمضه
أهون عليكي إن العما يسكن عنيكي وماتشوفيش ابنك واخوه متفرقين
متغرقين من بين شطوط اتكونت من دمهم !!
حقك تموتي وتصرخي مانتي امهم ...!!
فين كلمتك ؟!
فين قوتك يا ام الولاد ..؟!
فين خاطرك الموصول فــ روحهم من بداية ما اتكتب يوم الميلاد ..!!
مصدومه ليه ...؟!
كل اللي قادره عليه اديكي تفصلي توب الحداد !!
زعلانه ليه على دمهم
وانتي اللي خاطرك عندهم أصبح سراب !!
وابنك واخوه أغراب وأبعد مـ الغريب ..!!
حالك عجييييييب !!
خوفك رهيب ..
والغدر مش قسمه ونصيب
وانتي اللي عاوزه تصبري قلبك بــ شئ !!
وماعدش شئ يتقال خلاص ...!
كل الحروف اتإسفت .. واعتزلت السطر الحزين !
كل السنين مارضتش تمضي على اللي جاي ..!!
خافت لــَ توعد ماتلاقيش حاجه تساعدها على الوفا !!
خايفه الجفا ...!
حتى السحب متشبكه وماعدش إحساس بــ الصفا ...!
و..الروح بتنزف نفسها
لو ليها دم بـ يتنزف كان يغلب الموج والبحور
مهدور شعورك يا بلد أرخص ما فيها النفس والروح والشعور
مقهور حنينك لـــ الولاد
معذور شعورك بـــ الوجع يا أم البلاد ...
مليون وجع
مليون أسف
مليون حِداد مايكفنيش أوصف وجع من جوه روحك حستيه !!
بــ تموتي ليه ؟!
قومي انهضي ..
علي الصراخ ، إبكي وبوحي وفضفضي
يمكن فــ مره هــ يسمعوا
ويدمعوا
ويحسوا رهبه فــ قلبهم ...
قهرة عيال على أمهم !!
على بيت وطوبه بــ تتهدم !!
ويشدوا روحك مـــ الغرق
قبل الساعات ما تدق صفر فــ وقت ما هيقبل ندم !!
السبت 31 أغسطس 2013, 4:42 am